Alla Itolae Nusa 43
Me Kanane susate manane tapa rame.
Eleki kena manane rebe esi sabele mpai Mesire esi kane pusu peneka eleki amai ibeteke lokosi be,
“Imi keu sabe manane toto ete ite lekwe.”
Eleki Yehuda iralake amai be,
“Tamata rebe ikbasa me Mesire italuke ami titinai be, ‘Imi luake loko au suike moneka sepo imi keri kai imi kwalimi mulire mo!’
Sepo ama asuka le amiki kwalire ikeu sakesa kai ami hoko ami keu lopai Mesire kena sabe manane ete ite.
Po ama asuka le ikeu kai ami mo hoko ami keu lopai Mesire mo le tamata mere italuke ami be, ‘Imi luake suike lomei moneka sepo kwalimi mulire isakesa kai imi lomei mo!’”
Eleki Israele ibeteke lokosi be,
“Le mula pine imi ono susate ete au kena imi beteke kwalimi mulire ete tamata rebe ikbasa mpai Mesire?”
Eleki esi ralake be,
“Tamata mere itneu ami loko iteki lumatoini be, ‘Imi ama eri rue salo? Imi kwalimi mulire sae, o?’ Eleki ami beteke etei lulu saisa rebe tinai. Ami rekwa mo be namake pine ibeteke be, ‘Liku imi kwali mulire lomei.’”
Eleki Yehuda ibeteke loko amai Israele be,
“Sebeie kwetele mere ikeu kai au leke ami keu lopai Mesire kena sabe manane leke ama ale, ami kai amiki kwetelaru ite mata yake.
Namake pine au rakai, akotieni bei au sepo au leukeni lomei kai au betei lokomu mo, hoko au supu susate bei ale eti pela.
Mahake ama asuka le Benjamine hoko ele meije ami leu lomei le manane lakwai lua pene.”
Eleki Israele ibeteke lokosi be,
“Elemere hoko imi rana hasile rebe misete bei tapele meije kute kena imi karuna maka kute manane leke rilukele ete tamata elake mere. Hoko rana leite boini misete balsame, maka kinu tua kwelini, bumbu, leite kena ono tanei pulue mo kai badame buai.
Eleki imi keri kepene esi bokalaru rebai lua le kepene rebe akmena esi leukele imi keri kaie le mere tinake esi ono sala.
Hoko keu kai kwalimu kai akneka leke imi keu suike loko tamata elake mere.
Alla rebe Ikbasa titinai iono tamata mere laleije noa imi noma leke itie Simone kai Benjamine leke esi leu. Po sepo sirike auku anaru, hoko sebeisi neka!”
Eleki esi rana taneia meru kai kepene esi bokalaru rebai lua kai Benjamine eleki esi keu lopai Mesire. Esi luake eleki esi keu loko Yusupe.
Kena Yusupe iselu Benjamine iluake sakesa kai kwalinisi eleki ibeteke loko elake maka raka eni lumare be,
“Keri tamata meiju lopai luma lalei kai bunu binatane inai elake kai nkopane eleki moaele le kuata meije tamata meiju esi kane sakesa kai au.”
Eleki elake maka raka luma mere iono lupe Yusupe ibeteke eteije hoko ikeri tamata meru lopai Yusupe eni luma lalei.
Hoko Yusupe kwalini rilasi le esi kusuesi lopai Yusupe eni luma laleije. Eleki esi lepa loko lomai be,
“Esi kusue ite lomei meije le kepene petumilae esi leukele kena karune si laleije hoko esi kerike ite leke esi ono ite kena maka ulake kai esi rana iteki keledairu.”
Hoko esi tehaike elake maka raka Yusupe eni lumare eleki esi beteke kenai me metu uluije be,
“Ami kotie lepa mina ntuane! Petumilare ami luake kena sabe manane,
po kena ami roma otoi kena ntulu ami buka karune ami selu amiki kepenaru eru me kena kantune maka kute kepene me karune esi nanaije. Po meije ami leuke suike lomei.
Kai meije ami liku kepene makete lekwe kena ami sabe manane po ami rekwa mo be sire pine itolae kepene suike kena amiki karune esi nanaiju.”
Eleki iralakesi be,
“Ndene neka, rila yake. imi kai imi ama imi Alla Iriluke kepene mere me imi karune esi lalei kai imi kepena meru au supulu peneka.”
Eleki isirie Simone lokosi.
Eleki kena ikusuisi lopai luma laleije, irana kwele etesi kena esi koa lelale kai esi riluke manane ete esi keledairu.
Eleki pela mina pine esi namake Yusupe kena kuatare iluake lokosi hoko esi aknekae taneia rebe esi riluke ete Yusupe le esi lene be esi kane sakesa kai Yusupe ete mere.
Kena Yusupe ileu lomei luma eleki kwalinisi riluke taneia rebe esi kerilure ete Yusupe eleki esi tatu lokoi roma tapele.
Eleki itneusi be,
“Imi erimi mise, o? Amami, ntuane rebe imi betekeni imise o? Eri rue sa, o?”
Esi ralake Yusupe be,
“Amiki ama eri mise. Eri rue sa.”
Eleki esi tatu lope tapele bei Yusupe.
Eleki kena Yusupe ilimese kwalinisi, iselu Benjamine kwalini rebe luasi ina esare, ibeteke be,
“Meije imi kwalimi muli rebe imi betekeni ete aure, o?”Elekai ibeteke be,
“Alla Iriluke misete etemu auku anae!”Eleki kena iselu kwalini Benjamine rebe luasi inaisi esare hoko laleije penu eleki ikusu lopai eni kamare eleki irani ete mere.
Eleki ikoa oalaleije pine isiri lori muli lokosi hoko itahane lale kai ibeteke be,
“Tola manane.”
Hoko esi tola manane ete Yusupe tebikele kai ete kwalinisi tebikele kai tamata Mesire rebe esi kane sakesa kaise tebikele neka le tamata Mesire esi suka kane sakesa kai tamata Ibrani mo le esi noake be mere tamata ndopone.
Hoko kwalinisi rue me Yusupe oaije bei kwalini mena aruru roma kwali mulire hoko esi limese lomai kai hkutukesi.
Eleki esi riluke manane etesi bei manane rebe me Yusupe eni mejare hoko manane rebe ete Benjamine boka lesi bei kwalinisi rebai lima. Eleki esi kinu sakesa kai Yusupe kai lalesi ndina kaini.